Liturgische Stücke

Predigt zu Pfingsten: Unserm Herrgott soin Geischt in unsrer Welt

De Aposchtl Paulus hot emol en Brief gschriwwe an die Gemää vun Chrischde in Korinth. Do hot er n allerhand gsacht, wo wichdich is fer se zum Glaawe.

Er hot n verzehlt, dass unserm Herrgott soi Welt ganz annerscht is als wie die Welt, in dere wo mer lewen. Un dass des, wo in unsrer Welt gelde dut, nit immer des is, wo vor unserem Herrgott recht is, hot er gsacht.

Un dann hot de Paulus gschriwwe (1. Korinther 2, 12-16):

12 Mer hän nit den Geischt kriecht, wo vun dere Welt is. Mer hän unserem Herrgott soin Geischt kriecht. Vun doher wisse mer ach, was uns vun unserem Herrgott gschenkt worre is. 13 Un dodevun redde mer ach, awwer nit so, wie mer selwer dodevun redde kennden, vun dem allää, wo mer wissen. Mer redden dodevun, wie s unserm Herrgott soin Geischt uns sacht. Weil mer soin Geischt in uns hän, kenne mer sehe, was soin Geischt in unsrer ganze Welt bewirke dut. 14 En Mensch, so wie er aus sich selwer raus is, losst sich nit oi uf des, wo vun unserm Herrgott soim Geischt kummt. S kummt em so vor, als wie wann s norre Dummheide wären, un er kann iwwerhaupt nix dodevun verstehe. Weil, s muss alles aus em Geischt raus gsehe werre. 15 Seller Mensch awwer, wo ganz voll is vun unserm Herrgott soim Geischt, der dut alles vun do her beurdeile. Er selwer awwer kann vun nimand beurdeilt werre. 16 Wie’s beim Prophet Jesaja hääßt: „Wer hot n schun rauskriecht, was unsern Herrgott im Sinn hot, un wer will em sache, wie s recht is?“ Mer awwer, mer hän unserm Herr Jesus soin Geischt in uns.

Ehr liewe Leit,

unserm Herrgott soin Geischt. In uns drin. S is eichentlich ganz ääfach. Unserm Herrgott soin Geischt is in uns drin. Un aus soim Geischt raus känne mer lewe. So ääfach is des.

Odder am End doch nit? Wie is en des? Was fer ein Geischt is n in uns drin? Aus was fer em Gesicht raus du mer dann lewe?

1
Alsemol kummt s uns so vor, als wie wann en annere Geischt uns bstimme deet als wie der vun unserm Herrgott.

Gugge mer uns nor um unner uns. Do geht s schun alsemol e bissel rau zu um uns her. De äänd gennt em annere nit de Butter uf em Brot. De äänd versucht de annere auszedrickse. Do gelt kää Ricksicht und kään Respekt. Do is halt jeder sich selwer de Nächschde. Un do fliegen halt die Fetze.

Des is im Klääne so wie im Große. Bei uns dehääm, am Kichedisch un in de Wohnstub, in de Schul, im Betrieb, im Veroi, iwwerall, un wann ehr s noch nit wissen, dann verot ich eich des heit: sogar in de Kerch is des so. Iwwerall geht s zu, wie s in dere Welt halt zugeht.

Un jeder frocht sich: Wo käm mer dann hie, wammer do nit mitmache deet? Do det mer nor selwer de Kerzere ziehe. Un des kann s jo ach nit soi.

Nää, do kännte mer unser Gschichde verzehle. Mer hädden e ganzi Weil ze du, wann mer do aafange deeden mit em Verzehle. Do kännden mer jammre un klache, bis em schier s Heile kumme deet.

So geht halt zu in dere Welt, do beißt kää Maus en Fade draa ab. Des is de Geischt vun dere Welt, in dere wo mer lewen. All sin se nor uf ehrn Vordääl aus, allminner. Mer dann halt ach. Was soll mer dann sunscht mache?

2
Des is nit fer ugfähr so. Des is so, weil die Welt so is, wie se is. Vun Aafang aa. Genauer gsacht: Fascht vun Aafang aa. Nit erscht seit neilich, wie mer määne kännt. So is die Welt un so sin die Mensche.

In de Biwel werd e Gschicht verzehlt, wie des aagfange hot. Do hot de liewe Gott die Welt gemacht. Weil se halt nit vun allää aus em Nix hot raus kumme känne. Un dann hot er alles gut oigericht. Alles so gmacht, wie er selwer s hot hawwe wolle. Un alles war gut, richdich gut. Am Aafang.

Un so hätt s bleiwe känne. Wann er nit - weil er nit hot allää bleiwe wolle, de liewe Gott -, wann er nit die Mensche gschaffe hätt, uns Mensche, so wie mer halt emol sin. Selbstännich un storrkeppich, un mer wollen uns nix sache losse, vun nimmand nix. Mer määnen, mer wissden selwer, was gut is fer uns. Un des wolle mer dann ach ubedingt hawwe. Wie ewe die Frucht vun dem Baam im Paradies.

Und dodemit war s aus mit em Paradies. Do hot des Elend aagfange. Un s is vun mol zu mol schlimmer worre.

Ebbel strenze, wo em nix aagehen, en Turm bau, der wo bis an de Himmel gehe soll, noch de Sterne greife, wisse wolle, was gut is un was bees is. Selwer halt e bissel de Herrgott spiele wolle. Des war s, dodemit hot s aagfange.

Ach weil mer unnernanner aagfange hän, dass mer gechenanner gewest sin. Ääner geche de annere. Ich war s nit, die war s. Warum guggscht du des, wo der der gebt, besser aa als wie moins? Des kann ich gar nit verdraache. Nix wie weg mit em. Ich schlach em de Schädel oi.

Ehr kennen doch all die Gschichde vum Aafang vun unsrer Biwel. Uralde Gschichde. Un die wollen jo nit verzehle, wie ääns noch em annere bassiert is. Des wär jo kinnisch. Die wollen uns zeiche, wie s zugeht uf dere Welt, unner uns Mensche. So is die Welt, wollen se sache. So sin die Mensche. Allminanner.

Kääner is gut, ach nit ääner. Noch nit emol du selwer.

Ich wääß, des fallt schwer ze kabiere. Des will ääfach nit in moin Kopp noi. Kääner is gut, ach nit ääner, noch nit emol ich selwer. Wo ich doch sunscht immer mään, nor die annere wärn so schlecht, un ich wär de äänzich gude Mensch odder wenigschdens ääner vun dene wenniche, die wo gut sin.

Nää, des will nit in moin Kopp noi. E bissel viel, des, wo die Biwel em do zumut.

Nor alsemol, wann kääner zuguggt un zuheert, wann ich so ganz allää fer mich bin, dann kummt mer s fer en Acheblick. Do denk ich so fer mich – awwer nor, wann mer ach werklich kääner beim Denke zuguggt un zuheert – do denk ich alsemol fer mich, s kännt jo werklich so soi, dass ich mer selwer ach alsemol ebbes Schlechdes zudraue deet. Fascht so wie dene annere, vun dene wo ich wääß, was fer schlechde Lumbe des sin. E bissel ebbes Schlechdes wenigschdens, nadierlich nit so schlecht, wie die annere sin, awwer e bissel schlecht dann halt doch.

„Alles, wo die Mensche in ehrm Herz denken, des is schlecht, vun klää uf“, hääßt s in de Biwel in ääner vun dene Gschichde am Aafang. Ja, alsemol kummt s em schun so vor, wann mer mol ganz ehrlich is zu sich selwer.

3
Des sachen die alde Gschichde. S sin Gschichde. Ebbes anneres hämmer nit. Nor Gschichde. Was kännt mer sunscht ach hawwe? Iwwer des, wo s do drum geht, do kammer nit annerscht als wie mit Gschichde redde. Mit Gschichde un Bilder, weil, alles annere deet em liewe Gott es Heft aus de Hand nemme. Wie käme mer uns dann vor, wann mer klääne Menschekinner so du deeden, als wann mer alles verstehe kännden? Dann wäre mer selwer schun widder uf em Wech, dass mer de liewe Gott spiele wollden, un des dut uns nit gut.

Weil, immer wann Mensche aagfange hän, die liewe Gott ze spiele, hän se annere unnerdrickt und rumgstumbt. Dann hän se n ehrn eichene Wille ufgezwunge, un galsemol, wann se nit bariert hän, hän se se am End umgebrocht.

So is des mit unserer Welt. Des is de Geischt vun dere Welt. Elend, verdorwe un kreizschlecht. Kää Wunner, wann mer Mensche dann so sin, wie mer sin. So is die Welt halt.

Awwer: So derf se nit bleiwe. Des spiere mer dief in uns drin. Mer waaden druf, dass unser Welt annerscht wird. Un: So muss se nit bleiwe. Nit, wann s noch unserm Herrgott geht. Weil, er macht die Welt so, wie er se hawwe will.

Dodefor hot er sellemols aagfange, wie er sich des klääne Volk Israel ausgsucht hot. Dene hot er gsacht, wie er die Welt hawwe will. Dene hot er soi Gebode gewwe. „Ehr sollen... un: ehr sollen nit...“ Vielleicht wissen ehr s noch aus den Konfirmandestunn. Er hot en die Gebode gewwe, dass se wissen, was se du sollen, dass am End die Welt so wird, wie de liewe Gott se hawwe will. Un - dass se selwer dodebei mithelfe kännen.

Des is alsemol gut gange un alsemol nit. Desweche hot er se immer widder mol druf stumbe misse. Ehr missen de Gebode gehorche, sunscht geht die ganz Welt zum Deiwel. Ehr missen selwer ebbes du, dass die Welt annerscht wird. Immer widder hot er es en sache misse.

4
Un speeder dann, Johrhunnerde speeder, do hot unsern Herrgott sich vorgenumme, dass er selwer die Welt zurechtbringt. In unserm Herr Jesus is er uf die Erd kumme. Er hot gelebt unner uns. Ewe so, wie de liewe Gott will, dass mer Mensche lewen.

Gut war er zu de annere. Gholfe hot er n. Grad dene, wo s am meischde needich ghat hän. Un er hot en gsacht, dass se gut zunanner soi sollen. Sie sollen ehrn Nächschde liewe wie sich selwer, hot er gsacht. Un sie sollen sich uf ehrn Herrgott verlosse. Un die zwää Sache deeden zsammegheere: An de liewe Gott glaawe un die annere liebhawwe. Weil, wann de an die liewe Gott glaabscht, dann wääscht de, dass mer allminanner soi Kinner sin, un dann kannscht em annere nit bees soi. Dann muscht fer en sorche

Des is em nit gut bekumme, unserm Herr Jesus. Die Mensche hän sich des nit so ääfach gfalle losse. Weil der Herr Jesus dodemit nämlich die Grenze verwischt hot. Die Grenze, wo do sin zwische den, die wo sich aagstrengt hän, dass se halbwegs orntliche Mensche sin – so Leit, wie meer es sin-, un dene annere, die wo des wiwwerhaupt noch nit ernschthaft browiert hän.

Des hot se in ehrer Ordnung gsteert, un desweche hän se unsern Herr Jesus ufgehenkt. Awwer –Gott sei Dank - dodemit is die Gschicht nit zu End. De liewe Gott hot unsern Herr Jesus nit im Doot gelosst. Er hot em in soi eichens großes Lewe noi ufgenumme. Un dodemit hot er gezeicht: Die, wo so lewen, wie unsern Herr Jesus gelebt hot, die sin uf soinere Seit. Un unsern Herrgott bleibt uf dene ehrer Seit, uf ewich bleibt der bei en.

5
Un noch ääns: Ää fer allemol hot unsern Herr Jesus, wo er gstorwe is, alles in die Reih gebrocht, wo letz is in dere Welt. Allem, wo bees is, hot an soim Kreiz e End gfunne. Do is en Wech frei worre zurick zu unserm Herrgott. S steht nix meh zwische em liewe Gott un soine Mensche. Nix meh.

Vun jetzt aa kännen mer Menschekinner widder Vadder sache zu unserm Herrgott. Weil er uns alles vergewwe hot, wo zwische ihm un uns stehe kännt. Weil er uns ganz uf soi Seit riwwer zieht. Weil er halt unsern Gott is, un mer sin soi Kinner.

Do is ebbes bassiert, sellemols, mit unsrer Welt. Weil de liewe Gott es so hot hawwe wolle. Do is ebbes ganz annerscht worre.

Die Gschicht vun de Pingschde verzehlt dodevun. Unsern Herrgott hot soin Geischt iwwer die Welt ausgegosse. Iwwer all die, wo an en glaawen un mit em lewe wollen. Un dodemit is alles ganz annerscht worre. Die ganz Welt is annerscht worre.

Unserm Herrgott soin Geischt is uf äämol do in soiner Welt. In soine Menschekinner. Wie die Prophede frieher gsacht hän. Die ganz Welt is voll vun unserm Herrgott soim Geischt. Alle Mensche sin voll vun em.

6
Wann des so is, dann hätt jo die Froch, wo mer uns am Aafang gfrocht hän, e Antwort: Was fer en Geischt is n in uns drin? Aus was fer em Geischt raus dun mer lewe? Aus en Geischt vun dere Welt odder aus unserm Herrgott soim Geischt?

Ich behaupt heit emol ääfach: Aus unserm Herrgott soim Geischt. Wann ach vielleicht nor alsemol, wann s gut geht, un nit äänzich un allää.

Heere mer noch emol uf de Aposchtl Paulus un uf des, wo er uns do sacht. Mer hän en Geischt kriecht, wo uns zeicht: Alles, wo fer uns wichdich is im Lewe, krieche mer gschenkt. Des hämmer nit aus uns selwer raus. Mer hän uns unser Lewe nit selwer gewwe. Mer känne uns noch so aastrenge, mer wern nit gut aus uns selwer raus allää. Ich wääß: Des geht uns geche de Strich. Des is nit des, wo vor unsrer Welt fer richdich gelde dut. Mer wird schääl aageguggt, wammer des so sacht. Des nemmt em kaum ääner ab. Die halden em all fer doof.

Awwer so is es doch. Kääner vun uns schafft s, dass er vor unserm Herrgott gut dosteht, kääner vun uns schafft des aus eichener Kraft. Un wann mer noch so gut sin un noch so dichtich. Was mer brauchen, des hot unsern Herrgott selwer fer uns gedaa.

Des is es, wo mer spieren, wann soin Geischt in uns is. S Wichdigschde im Lewe hämmer vun unserm Herrgott kriecht.

7
Un dann is es awwer noch ebbes, wo mer in uns spiere: Unserm Herrgott soin Geischt, unserm Herrgott soi Kraft is in uns drin. Mer kännen aus soim Geischt raus lewe. Un soin Geischt is do in unsrer Welt. Iwwerall is er am Schaffe un Wirke. Midde unner uns.

Glaawen er s nit? Mer hän unserem Herrgott soin Geischt in uns drin. Mer hän unserm Herr Jesus soim Geischt in uns drin. Mer missen en nor raus losse.

Guggen eich nor mol um. Hän er noch nit gemerkt, was es alles unner uns gebt an Gudem, wo alle Dach gedaa wird? Wo ääner uf de annere ufbasst un ääner fer de annere sorcht?

Denken doch nor mol dodraa, was alles unner uns in ... odder sunschtwo bassiert.

Wo Kinner noch ehrm Vadder odder ehre Mudder guggen un fer se sorchen. Wo en Nochber fer de anner do is. Wo mer sich kennt un sich halt nit allää losst, wann s needich is. Wo ääner in ener Firma, in de Schul, uf de Gass en annere mol frocht, wie s em geht. Wo ääns nit allää gelosse wird, wann de Mann oder die Fraa gstorwe is, un Aaschluss find an e paar Leit, wo sich um ääns kimmern. Wo ääns ääfach spiert, do is en annere nit gut druf, un dann ääfach fer en do is, e gudes Wort fer en hot un bei em is.

Dausend Sache kännden mer do ufzehle. Dausend Sache. All des Gude, wo unner uns Dach fer Dach gedaa wird. Un s deet kää End nemme.

(Wissen er was, nochher geb ich eich an de Deer ebbes ze schreiwe, un dann dun er drauß uf den große Babierbahne vor de Kerchedeer ääfach emol alles ufschreiwe, was eich oifallt, wo unner uns ääns fer s annere do is.

Unserm Herrgott soin Geischt in unsrer Welt. S wär doch gelacht, wammer do nit allerhand zsammebrächden. Ich bin sicher, do steht am End es ganze Blatt voll, vun owwe bis unne, ringsum die ganz Kerch schiergar.

Unserm Herrgott soin Geischt in unsrer Welt. Mer hän unserm Herrgott soin Geischt in uns. Un mer kännen des du, wo er vun uns hawwe will.

Mer missen vielleicht nor mol unser Aache ufmache, dann känne mer des schun sehe. Ich glaab, mer hän nor nit so Acht druf. Mer sehe immer nor des, wo schlecht is un schlimm. Mer sollden emol e bissel meh achtgewwe uf all des annere, des wo unner uns an Gudem gedaa wird, dann deeden mer schun merke, dass unserm Herrgott soin Geischt am Werk is in unsrer Welt.

Alla, basse mer e bissel dodruf uf. Gugge mer uns um unner uns. Unserm Herrgott soin Geischt is am Werk unner uns.

Awwer des hot wie alles in de Welt en Hoke: Es geht nit ohne uns. Mer sin mit debei. Mer kännen Gudes du. Bstimmt nit aus unsrer Kraft allää. Awwer aus dere Kraft, wo unser Herrgott uns gebt.

Weil, er will soinere Welt zum Gude helfe. Er will Gudes du. Un er will, dass mer Gudes dun. Wie sacht deer Aposchtl Paulus:

Mer hän nit den Geischt kriecht, wo vun dere Welt is. Mer hän unserem Herrgott soin Geischt kriecht. Doher wisse mer ach, was uns vun unserem Herrgott gschenkt worre is... Weil mer soin Geischt in uns hän, kenne mer sehe, was soin Geischt in unsrer ganze Welt bewirke dut.

Un des wolle mer nochher ufschreiwe, bis ins Äänzelne noi. Dass mer draa denken, dass mer s selwer nit vergessen. Un dass anner Leit es sehe.

Unserm Herrgott soin Geischt in unsrer Welt. Amen.

Liturgische Stücke

Psalm 27

Unsern Herrgott is fer mich wie e Licht,
wo moi Lewe hell macht.
Vor wem sollt ich mich do ferchde?
Moin Herrgott gebt moim Lewe Kraft.
Vor wem sollt ich do Angscht hawwe?
Ääns deed ich moin Herrgott gern bidde,
ääns hätt ich gern vun em:
dass ich moi Lebdach bei em in soiner Neeh bleiwe kennt,
als wie wann ich in soim Haus wohne deet.
Ich deet gern zugucke, wie en all minanner feire dun,
alle Mensche un alle Diere un alle Engel,
midde in soim wunnerschäne Templ.
Gott, heer doch uf moi Stimm, wann ich zu deer ruf.
Guck runner uf mich un heer uf mich.
In moim Herz drin sag ich deer,
was du zu uns gsagt hoscht:
Ehr sollen zu mer kumme un noch mer suche.
Desweche kumm ich zu deer und such dich.
Guck doch runner uf mich, versteckel dich nit.
Un stump mich in doim Zorn nit vun deer fort.
Du helfscht mer doch. Verloss mich nit.
Un loss mich doch spiere, dass du do bischt.
Uf dich will ich mich ganz verlosse.
Moin Vadder un moi Mudder gehen mol vun mer fort.
Awwer du, liewer Gott, nemmscht mich doch uf.
Ich glaab ääfach, am End werr ich sehe,
wie gut du zu uns all bischt,
zu all dene, wo uf dere Welt wohnen.
Bass nor uf. Du muscht nit verzweifle.
Verloss dich ääfach uf doin Herrgott.
Glaab an en un frää dich draa.

Eingangsgebet

Liewer Gott, du hoscht uns doin Heilicher Geischt versproche. Du willscht en in uns noi gewwe, dass mer en spiere in uns. – Alsemol fiehle mer uns gar nit so, als wann doin Geischt in uns drin wär. Do simmer iwwel draa un wissen nit, wie alles emol e End nemmt. - Kumm du zu uns mit doim Geischt. Loss en uns spiere. Mach uns nochemol zu neie Mensche. Helf uns, dass mer uns uf dich verlossen un lewen, wie du s vun uns hawwe willscht. Amen.

Lesung

Pfingstgeschichte
oder: Vum Turmbau in Babel, aus Walter Sauer, Die Pälzer Biwel, Landau 1991

Gebet

Liewer Gott, du hoscht doi Welt gut gemacht, un du willscht, dass se am End gut werd. Dodevor willscht du mit doim Geischt bei uns soi. Dodriwwer simmer froh.

Loss uns die Welt mit doine Aache sehe. Loss uns sehe, wo iwwerall Gudes unner uns bassiert. Wo ääns em annere helft un wo mer ferenanner do sin. Jede äänzelni gudi Tat, wo mer unnernanner dun, loss du wie en Stern iwwer doinere Welt funkle.

Loss uns spiere, dass doin Geischt in unsrer Welt un in unserm eichene Herz drin do is. Helf uns, dass mer aus doim Geischt raus alles dun, wo mer kännen, dass doi Welt so gut wird, wie du se hawwe willscht.

Helf du dene, wo allää sin, an dene wo annere ääfach vorbeigehen. Helf du dene, wo nor sich selwer sehen un wo nor ehr eichenes Glick suchen, dene, wo iwwerall Hass schieren un wo ohne Ricksicht uf annere un mit Gewalt ehrn Wille dorchsetzen. Mach du dene ehr Herz wääch, geb en doin Geischt un loss se e bissel ebbes fiehle fer die Mensche newer ne.

Helf du dene, wo schlimm draa sin, de kranke Leit, de arme Leit uf dere Welt. Loss se ääner finne, wo ehn helft. Un loss se wisse, dass du fer se do bischt.

Helf du ach dene viele Leit do, wo unner em Kriech leiden un unner ener Hungersnot. Loss se nit verzweifle un geb dene, wo helfe kännen, doin Geischt, dass se am End dann ach helfe dun.

Loss die, wo unner uns gstorwe sin, bei deer ufghowe soi ... Loss se bei deer e Lewe finne, wo kää End hot. Un trickel du dene die Träne ab, wo traurich dodriwwer sin, dass se ääns hän gehe losse misse, wo se lieb ghat hän. Geb ehn Kraft fer ehrn Wech.

Uf dich wolle mer uns verlosse. Am End loss uns bei deer ufghowe soi und fer immer spiere, dass du gut zu uns bischt.

ein Lied

1. Kumm her, du Geischt vum Herrgott, / un kehr heit bei uns oi, / mach s hell in unsre Herze / un loss uns bei deer soi. / Steck uns aa mit doim Feier, / mach alles in uns nei, / un loss uns immer treier / fer dich doi Kinner soi.
2. Mer wollen dich bekenne, / weil du ganz zu uns haltscht, / uns nit alsfort verrenne, / weil d sunscht bloß ane fallscht. / Mer wollen zu deer gheere / fer jetzt un alle Daach / un uns gar nit beschwere, / du helfscht, dann geht s jo ach.
3. Du liewer Gott, jetzt heer uns / un loss uns nit allää. / Mer määnen alsmol, s deet nit / meh weider mit uns geh. / Helf, dass mer heit die Kraft hän, / fer dich ganz oizusteh / un alle Leit zu saache, / wie gut s uns mit deer geht.

Melodie EG 243: Lob Gott getrost mit Singen, vun em Volkslied aus em 16. Johrhunnert, Entlaubt ist uns der Walde, fer e Kerchelied iwwernumme in Nirnberg 1535 - noch em Lied EG 136, O komm, du Geist der Wahrheit, vum Philipp Spitta, 1827, nochgedicht vum Werner Schwartz, 1994.

Weitere Lieder finden sich in dem Büchlein Kerch uf pälzisch, das bei der unten angegebenen Adresse bestellt werden kann.

Protestantisches Dekanat, Dekan Dr. Werner Schwartz
Gartenstraße 6, 67227 Frankenthal (Pfalz), Telefon 06233-880 80, Fax 880 881
eMail dekanat.frankenthal@t-online.de oder
werner.schwartz@t-online.de
Internet www.evpfalz.de/bezirke/franken